Sykkeltur Maristova - Lærdalsøyri

Turen startar ved Maristova og endar på Lærdalsøyri og er ca. 55 km lang. Det er for det meste lange slake utforbakkar og lange flatar. Vi syklar for det meste på den gamle riksvegen gjennom Lærdal og på lokale vegar. Nokre få stader må vi langs E16 på korte strekk. Det lengste strekket på E16 er ca. 3 km. Turen går utanom turisttida, så vi unngår den store turisttrafikken.

På turen blir det mange stopp, m.a. ved Borlaug, Borgund stavkyrkje, enden av Vindhellavegen, Husum hotell, Galdane, den historiske vegen, mange flotte utsiktspunkt, gammal arkitektur under vegs og i gamle Lærdalsøyri.

Vi er avhenige av brukbart ver. Turen kan difor bli utsett til laurdag 20. juni, avlyst eller endra på kort varsel.

Du må sjølv frakta sykkelen din til Maristova og heim att.

Vi planlegg felles skyss med syklar og deltakarar tilbake til Maristova. Det blir ei eigenbetaling på 200 kr. for dette. DNT Valdres sender rekning etter turen.

Turen passar både med vanleg sykkel og elsykkel. Vi syklar i samla flokk. Sidan vi syklar på trafikkert veg, må vi halda god avstand til kvarandre. På dei lokale vegane er det til vanleg liten biltrafikk. På dei korte strekka på E16 må vi vera spesielt forsiktige. Alle må ha og bruka sykkelhjelm og refleksvest. Dette blir sjekka før vi reiser frå Fagernes.

Turen startar på ca. 800 m. o.h. og endar nede ved fjorden. Det er difor viktig å kle seg for temperatur og ver kan endra seg mykje på turen. Sykkelen må vera i god stand, og du må vera i god fysisk form. Det er få stigningar på turen, men det blir mange timar på sykkelsetet, så du bør ha sykla ein del før denne turen. Ha med eiga sykkelpumpe som passar til sykkelen, lappesaker eller aller helst ekstra sykkelslange. Det gjer det enklare dersom du skulle punktera.

Utstyr deg med niste og drikke for ein lang dag.

Du er med på turen på eige ansvar. Vi er to turleiarar, ein fremst og ein bak og vil leggja til rette for at turen skal bli så sikker og hyggeleg som mogeleg.

Frammøte på tidlegare Shell på Fagernes kl. 08.30. Dersom du ønskjer å møta vest for Fagernes, avtalar du dette med turleiar når du melder deg på turen.

Påmelding:

• Enten elektronisk nedanfor denne turomtalen.
• Eller på sms til turleiar Bjørn Vegard Johnsen på 48142002.
• Maks. 10 deltakarar i tillegg til 2 turleiarar.

Kart: Cappelen Damm kart 2 Sør-Norge nord Bil og turistkart